ماذا لو فشلت الثورة لا قدر الله
«كنا هنلاقى ناس كتيرة جدا طالعة بتقول: (أنا من يوم 25 يناير وأنا بايت فى ميدان)».
قال أحد الأصدقاء الذى شارك فى قيادة إحدى اللجان الشعبية: «كنت هاكمل عمرى من غير ما اتعرف على جيرانى فى العمارة».
«بدل أغنية حمادة هلال (شهداء 25 يناير راحوا ف أحداث يناير) كنا سنستمع لأغنية (أستاذ جمال مبارك ابن الريس مبارك)».
وقال صديق: «كنا هنفضل عايشين على ذكرى الأهرامات وجون حمص فى إيطاليا والدقيقتين بتوع ماتش البرازيل وجون مجدى عبدالغنى فى كأس العالم اللى بيذلنا بيه لحد دلوقتى».
بالنسبة للوزراء أبوالغيط فى مؤتمر صحفى: «مش قلت لكم احنا غير تونس؟!»، منح العادلى قلادة النيل، أحمد زكى بدر بدل ما هيحول المدارس تجريبى كان هيخلى البلد كلها تجريبى، بطرس غالى يفرض ضريبة جديدة وهى ضريبة انك لسه عايش فى مصر، كانوا هيلغوا يوم الجمعة.. هيبقى خميس سبت على طول، مانشيت الأخبار «ضبط 8 ملايين من مثيرى الشغب»، شعار مؤتمر الحزب 2011 «علشان تبقى تعمل راجل تانى».
وقال آخر: «كان المستشار مرتضى منصور هيطلع السى ديهايه بتاعت مارك ذكربرج مخترع الفيس بوك».
وقال أحدهم: «كان محمود سعد هيشترى كل بيجامات العالم بالتسعة مليون اللى كان بيقبضهم ويقعد يغير فيهم فى البيت».
وقال صديق: «بعد تنحى مبارك لأسباب صحية وتولى جمال كان سيخرج علينا على الدين هلال، قائلا: «هرمناااا هرمنااا لنصل إلى هذه اللحظة التاريخية».
بخصوصى أنا «كان المقال ده زمانه بيتكتب على ورق جرايد قديم جوا المعتقل على ضوء شمعة من بواقى دهن اللحمة بتاعت يوم الجمعة.. أمير الانتقام»، أو كنت هاختفى للأبد بعد انتشار لافتة «مبارك طير انت».
وقالت صديقة: سيظهر شعار جديد «ارفع راسك فوق لما تشوف حلمة ودنك».
ورد صديق بشعار آخر كنا سنراه «أنا هانتخبك يا ريس حتى لو دمى سال.. ولو انت ماترشحتش هانتخب ابنك جمال».
بالنسبة للفن (تامر حسنى يقدم لنا أغنية «كدهوه» ردا على أغنية محمد منير «إزاى»).
وبالنسبة للرياضة «أمن الدولة كان هيشارك بفريق فى الدورى.. اسمه (اتحاد الملفات)».
بالنسبة للعالم العربى «كانوا الليبيين هيصرفوا نظر عن الثورة».
وبالنسبة للبرلمان «فتحى سرور يضع على مجلس الشعب لافتة الدخول للوطنى فقط ويجبر الأعضاء على تغيير صفتهم يا وطنى يا كوتة».
أنا شخصيا ظللت طول الليل أنتظر إجابة بعينها، وعندما فقدت الأمل ظهرت هذه الإجابة تتهادى أمامى بثقة وشموخ وبساطة..
«لو كانت الثورة مانجحتش.. كنا هنعمل ثورة تانى».
0 التعليقات:
إرسال تعليق